ព្រះបន្ទូលថ្ងៃនេះ

ការសម្ដែងល្ខោននៃការយល់សប្តិ

លោកុប្បត្តិ ៤២:១៨-៣៨

យ៉ូសែបបានឃាត់ស៊ីម្មានទុក ហើយឲ្យពួកបងប្រុសឯទៀតនាំយកស្រូវត្រឡប់ទៅស្រុកវិញ ហើយបង្គាប់ឲ្យពួកគេនាំបេនយ៉ាមីនមកជួបខ្លួនផង។ ការនេះគឺដើម្បីឲ្យសម្រេចការយល់សប្តិទី២របស់យ៉ូសែប ដែលថាគ្រួសារទាំងមូលត្រូវឱនក្រាបចំពោះគាត់។

គិត និងស្វែងយល់

យ៉ូសែបបានចោទប្រកាន់ពួកបងប្រុសរបស់គាត់ពីការលួចស៊ើបការ ហើយយកគេទៅដាក់គុកអស់៣ថ្ងៃ។ ក្រោយមកគាត់ក៏ឲ្យពួកគេយកស្បៀងត្រឡប់ទៅស្រុក តែទុកស៊ីម្មានឲ្យនៅ។ យ៉ូសែបបានសន្យាថា ខ្លួននឹងដោះលែងស៊ីម្មាន ឲ្យតែគេនាំប្អូនពៅរបស់គេឲ្យមកជួបនឹងខ្លួន។ ពេលឮយ៉ូសែបនិយាយដូច្នោះ ពួកគេក៏ពិបាកចិត្តដោយព្រោះគេនឹកដល់ការអាក្រក់ ដែលគេបានធ្វើចំពោះយ៉ូសែប (១៨-២៥)។

តើព្រះកំពុងបង្រៀនអ្វីដល់ខ្ញុំ?

១៩-២២ ពេលយ៉ូសែបទុកស៊ីម្មានធ្វើជាអ្នកទោសនោះ ពួកបងគាត់បាននឹកចាំពីអ្វីដែលខ្លួនបានធ្វើចំពោះយ៉ូសែប តាំងពីយូរមកហើយនោះ។ ហើយរូបេនបានគិតថា ការនេះជាទណ្ឌកម្មរបស់ព្រះចំពោះឈាមរបស់យ៉ូសែប។ តើហេតុការណ៍ដែលយើងជួបសព្វថ្ងៃនេះ រំលឹកយើងពីអំពើបាបអតីតកាលឬទេ? ទោះជាអំពើបាបរបស់យើងកន្លងផុតទៅហើយក្ដី ក៏យើងមិនត្រូវព្រងើយកន្តើយឡើយ ហើយត្រូវឆ្លើយតបដោយយកចិត្តទុកដាក់វិញ។

២៦-៣៥ ពេលពួកបងយ៉ូសែបបានឃើញប្រាក់នៅក្នុងបាវស្រូវ នោះគេក៏មានការកោតខ្លាចចំពោះព្រះ។ គេគិតថា ព្រះកំពុងដាក់ទណ្ឌកម្មគេចំពោះការលក់យ៉ូសែប។ តែតាមពិត ព្រះកំពុងសម្រេចផែនការរបស់ទ្រង់ក្នុងការជួយសង្គ្រោះគេវិញ។

អានគម្ពីរ៖ កិច្ចការ ១០:១២

អធិស្ឋាន៖ ពេលយើងខ្ញុំគិតអំពើបាបអតីតកាលរបស់ខ្លួននោះ សូមជួយឲ្យយើងខ្ញុំប្រែចិត្ត ហើយបែរមករកទ្រង់វិញ។