ព្រះបន្ទូលថ្ងៃនេះ

ការយល់សប្តិរបស់ផារ៉ោន

លោកុប្បត្តិ ៤១:១-១៣

ស្ដេចផារ៉ោនមានយល់សប្តិចំលែក២ ហើយបានបង្គាប់ឲ្យពួកហោរា និងពួកអ្នកប្រាជ្ញមកជួយកាត់យល់សប្តិ​នោះ។ តែគ្មាននរណាម្នាក់អាចកាត់ស្រាយថ្វាយទ្រង់បានឡើយ។ រួចអ្នកថ្វាយពែងក៏បាននឹកចាំពីយ៉ូសែប។

 

គិត និងស្វែងយល់

ពេលយ៉ូសែបនៅក្នុងគុកនៅឡើយ ផារ៉ោនមានការយល់សប្តិ២នៅក្នុងយប់តែ១។ ការយល់សប្តិនោះចំលែក​ណាស់ ហើយផារ៉ោនមានព្រះទ័យព្រួយពេលភ្ញាក់ឡើង។ ដូច្នេះនៅព្រឹកឡើង ផារ៉ោនក៏បានហៅហោរា និងពួកអ្នកប្រាជ្ញាឲ្យមកជួយពន្យល់ប្រាប់ខ្លួនពីការយល់សប្តិនោះ តែគ្មាននរណាអាចកាត់ស្រាយពន្យល់បាន​ឡើយ។ ការនេះដោយព្រោះ ព្រះបានបង្ហាញតាមរយៈការយល់សប្តិនោះ តែក្រោយមកអ្នកថ្វាយពែងនោះ ក៏នឹកចាំពីយ៉ូសែប ដែលបានកាត់យល់សប្តិខ្លួន ហើយបានទូលថ្វាយផារ៉ោន។ នេះជាពេលវេលាកំណត់​របស់ព្រះ (៩-១៣)។

តើព្រះកំពុងបង្រៀនអ្វីដល់ខ្ញុំ?

១ យ៉ូសែបបានគិតថា ខ្លួននឹងត្រូវបានគេដោះលែង នៅពេលដែលអ្នកថ្វាយពែងនោះត្រូវបានគេដោះលែង តែ២ឆ្នាំកន្លងផុតទៅហើយ គាត់នៅតែនៅក្នុងគុក។ ទោះជាមើលទៅ ដូចជាយ៉ូសែបចំណាយពេល២ឆ្នាំឥត​ប្រយោជន៍ក្ដី ក៏គាត់ត្រៀមខ្លួនធ្វើជាអ្នកគ្រប់គ្រងនៃអេស៊ីព្ទដែរ។ ដូច្នេះនៅក្នុងព្រះ គ្រប់នាទីសុទ្ធតែមាន​ប្រយោជន៍។

៩-១៣ អ្នកថ្វាយពែងនោះបាននឹកចាំពីយ៉ូសែប ដែលបានកាត់យល់សប្តិខ្លួន កាលពី២ឆ្នាំមុន ហើយក៏បាន​ទូលថ្វាយដល់ផារ៉ោន។ ការធ្វេសប្រហែសរបស់គាត់ ក្នុងការភ្លេចនូវការស្នើសុំរបស់យ៉ូសែបនោះ វាហាក់​ដូចជា​​ព្រៃ​ផ្សៃណាស់ តែអ្វីគ្រប់យ៉ាងត្រូវធ្វើទៅតាមពេលវេលាកំណត់របស់ព្រះ។

អានគម្ពីរ៖ យ៉ូហាន ១៧-២១

អធិស្ឋាន៖ សូមជួយយើងខ្ញុំឲ្យរស់នៅដោយស្ងប់ស្ងាត់ រហូតដល់ទ្រង់បង្ហាញដល់យើងខ្ញុំ នូវការងាររបស់ទ្រង់ ទោះជាយើងខ្ញុំមិនយល់ពីគោលបំណងទ្រង់ក្ដី៕