ព្រះបន្ទូលថ្ងៃនេះ

អ្វីដែលព្រះបានធ្វើ
លោកុប្បត្តិ ៤៥:១-១៥

យ៉ូសែបបានបង្ហាញពីអត្តសញ្ញាណខ្លួន បន្ទាប់ពីមើលឃើញនូវទឹកចិត្តរបស់យូដាក្នុងការលះបង់ខ្លួន។ ទោះជាពួកបងៗខ្លាចយ៉ូសែបសងសឹកក្ដី ក៏យ៉ូសែបបានបញ្ជាក់ដល់គេថា អ្វីគ្រប់យ៉ាងសុទ្ធតែជាផែនការរបស់ព្រះទេ។

តើព្រះជានរណា?

            ៨ ព្រះបានតាំងយ៉ូសែបឲ្យធ្វើជាទីប្រឹក្សារបស់ផារ៉ោន។ ដោយបានដឹងពីការនេះ ទើបយ៉ូសែបបម្រើតែព្រះជាម្ចាស់របស់គាត់តែមួយប៉ុណ្ណោះ មិនបម្រើព្រះរបស់អេស៊ីព្ទណាមួយឡើយ ទោះជាគាត់ធ្វើការឲ្យផារ៉ោនក្ដី។ តើព្រះ ពិតជាម្ចាស់តែមួយគត់នៃគ្រួសារ ការងារ និងក្រុមជំនុំយើងឬ?

គិត និងស្វែងយល់

            ពេលយ៉ូសែបឃើញច្បាស់ថា ពួកបងប្រុសរបស់គាត់ចេះស្រលាញ់គ្នាវិញហើយនោះ គាត់ក៏បង្ហាញនូវអត្តសញ្ញាណខ្លួនដល់ពួកគេ ហើយយំយ៉ាងខ្លាំងនៅចំពោះគេ។ យ៉ូសែបបានទទួលស្គាល់ថា ព្រះបានចាត់គាត់ឲ្យមកអេស៊ីព្ទ ដើម្បីជួយសង្គ្រោះដល់គ្រួសារខ្លួន ដូច្នេះ គាត់ក៏ប្រាប់ដល់ពួកបងៗថា កុំឲ្យបារម្ភពីរឿងដែលគេបានលក់គាត់នោះឡើយ (១-៨)។ ហើយគាត់ក៏ប្រាប់ដល់គេថា គ្រោះអត់ឃ្លាននឹងបន្ត៥ឆ្នាំទៀត ដូច្នេះ ក្រុមគ្រួសាររបស់គាត់ត្រូវមកឯអេស៊ីព្ទ ដើម្បីបានរស់។ គាត់ក៏បានសន្យាផងដែរថា គាត់នឹងថែទាំគេ ពេលគេមកដល់ស្រុកអេស៊ីព្ទ (៩-១៥)។

តើព្រះកំពុងបង្រៀនអ្វីដល់ខ្ញុំ?

            ៤-៨ យ៉ូសែបបានឃើញថា ការគ្រប់យ៉ាងទាំងអស់ ព្រះទ្រង់ធ្វើដើម្បីការល្អ ហើយគាត់បានពិសោធនូវការដឹកនាំរបស់ព្រះ ដែលផ្ដល់ដល់គាត់នូវការយល់សប្តិ និងសម្រេចការយល់សប្តិនោះ។ ដូច្នេះហើយ ដោយមិនមានគំនិតសងសឹកនោះ យ៉ូសែបថែមទាំងអរគុណដល់ព្រះ ហើយគាត់រក្សាជំនឿលើការងារ និងភាពសប្បុរសរបស់ទ្រង់ផងដែរ។ ចូរជញ្ជឹងគិតលើរបៀបដែលព្រះបានធ្វើការល្អក្នុងជីវិតយើង។

អានគម្ពីរ៖ កិច្ចការ ២៧-២៨

អធិស្ឋាន៖ យើងខ្ញុំសូមច្រៀងសរសើរដល់ព្រះនាមទ្រង់ ដែលធ្វើការល្អក្នុងជីវិតរបស់យើងខ្ញុំ។

©សម្ព័ន្ធព្រះបន្ទូលកូរ៉េ និង CTM