ព្រះបន្ទូលថ្ងៃនេះ

ចូរឈានទៅរកភាពពេញវ័យ

ហេព្រើរ ៥:១១-៦:៨

អ្នកនិពន្ធនេះ ពន្យល់ពីសារៈសំខាន់ក្នុងការស្ដាប់ព្រះបន្ទូល ដែលព្រះមានបន្ទូលទៅកាន់កូនរបស់ទ្រង់ និងសារៈសំខាន់ក្នុងការឆ្លើយតបដោយស្ដាប់បង្គាប់។ ហើយគាត់ក៏ដាស់តឿនយើងឲ្យមានភាពពេញវ័យក្នុងក្ដីជំនឿ។

តើព្រះជានរណា?

            ៦:១-៣ ព្រះជួយយើងឲ្យមានភាពពេញវ័យក្នុងក្ដីជំនឿ។ ដើម្បីធ្វើការនេះ ទ្រង់បានចាត់ព្រះយេស៊ូវឲ្យមកទទួលការលំបាកដូចយើងដែរ ហើយព្រះក៏នាំទ្រង់ឲ្យមានជ័យជំនះ។ ចូរកុំខកចិត្តឡើយ ទោះជាយើងបរាជ័យ ដោយបានខំប្រឹងប្រែងហើយក្ដី។ ព្រះបានប្រទានដល់យើងនូវព្រះយេស៊ូវ។ យើងត្រូវពឹងផ្អែកលើជំនួយនៃព្រះយេស៊ូវ ហើយឈានឆ្ពោះទៅរកភាពពេញវ័យ។

គិត និងស្វែងយល់

            អ្នកនិពន្ធនេះចង់ពន្យល់បន្ថែមអំពីទំនាក់ទំនងរវាងព្រះយេស៊ូវ និងលោកម៉ិលគីស្សាដែក តែគាត់មានការខកចិត្ត ដោយព្រោះពួកអ្នកអានមិនមានភាពពេញវ័យខាងជំនឿល្មមនឹងអាចយល់បាន។ ទោះជាគេបានជឿលើព្រះយេស៊ូវយូរមកហើយក្ដី ក៏គេនៅដូចជាកូនតូច ដែលត្រូវការទឹកដោះ ជាជាងអាហារឹងដែរ (៥:១១-៦:៣)។ ទោះជានរណាម្នាក់បានពិសោធនូវព្រះគុណព្រះ និងព្រះវិញ្ញាណបរិសុទ្ធក្ដី បើគេព្យាយាមរករឿងទាស់នឹងព្រះយេស៊ូវ ហើយបដិសេធទ្រង់ ដើម្បីគេចផុតពីការឈឺចាប់នោះ គេមិនអាចហៅខ្លួនគេថា ជាគ្រីស្ទានពិតប្រាកដបានទេ។ ដើម្បីឲ្យគ្រីស្ទានអាចទ្រាំទ្រនឹងការឈឺចាប់នោះ គេត្រូវទទួលទានព្រះបន្ទូលព្រះ ដូចជាអាហាររឹង ហើយកាន់តែមានភាពពេញវ័យខាងឯវិញ្ញាណ (៦:៤-៨)។

តើព្រះកំពុងបង្រៀនអ្វីដល់ខ្ញុំ?

            ៦:៧-៨ បើយើងក្លាយជាដី ដែលដុះតែបន្លា និងអញ្ចាញជំនួសដំណាំមានប្រយោជន៍នោះ ទោះជាយើងធ្លាប់ទទួលព្រះគុណនៃការប្រោសលោះក៏ដោយ គង់តែយើងមិនអាចគេចផុតពីបណ្ដាសា និងការជំនុំជំរះរបស់ព្រះបានឡើយ។ តើផលផ្លែប្រភេទណាដែលយើងបញ្ចេញ?

អានគម្ពីរ៖ ១ថែស្សាឡូនិច ១-៥

អធិស្ឋាន៖ សូមឲ្យយើងខ្ញុំបង្កើតផលផ្លែនៃការស្ដាប់បង្គាប់ ដែលមិនបដិសេធព្រះគុណ ដែលទ្រង់ផ្ដល់ឲ្យ ហើយជួយយើងខ្ញុំឲ្យបានគាប់ព្រះទ័យទ្រង់៕